मोगरा

अलवारशा गुलाबी धुक्याला, सजवून गेला मोगरा हा
अन चेतल्या पहाटेस कैसा, विझवून गेला मोगरा हा

इतुक्यात जाग यावी पहाटे, इतुक्यात का हे भान जावे
गंधात दंगल्या पाकळ्यांना, उजवून गेला मोगरा हा

ओलावल्या दवांचे बहाणे, स्पर्शात वेडे जागण्याचे
स्पर्शात या बरसल्या दवांना, भिजवून गेला मोगरा हा

लाजेत रंग ओले ढळाले, अन पैंजणांना सूर आले
उबदारशा कसा या मिठीला, थिजवून गेला मोगरा हा